ԱՊԱԳԱ ՎԱՐՈՐԴ
«ԱՊԱԳԱ ՎԱՐՈՐԴ» ԽԱՂԻ ԿԱՆՈՆՆԵՐԸ
Խաղի մասնակիցների վերջնական նպատակը
Խաղում հաղթող է ճանաչվում այն մասնակիցը, ում հաջողվում է հռչակվել “Ապագա Վարորդ”: Դրա համար յուրաքանչյուր մասնակից պետք է հավաքի «Վարորդի քարտերի» ամբողջական հավաքածուն, որը ներառում է 6 տարբեր “Վարորդի քարտ” և այդ քարտերը ապահով կերպով տեղադրի իր “Ավտոտնակի” ներքո:
“Վարորդի քարտերի” ամբողջական հավաքածուն հավաքելուց հետո, հաղթող ճանաչվելու համար պետք է վերադառնալ “Սկիզբ” վանդակ:
Խաղը սկսելուց առաջ
Ø Խաղի յուրաքանչյուր մասնակից պետք է ընտրի 1 խաղաքար և տեղադրի այն “Սկիզբ” վանդակի վրա:
Ø “Հարց քարտերը” պետք է խառնել և դնել սեղանին` հարցերը դեպի ներքև:
Ø “Վարորդի քարտերը” պետք է խառնել և դնել սեղանին` երեսը դեպի ներքև:
Ø Խաղի յուրաքանչյուր մասնակից պետք է վերցնի մեկ “Ավտոտնակ” և դնի իր առջև:
Ø Խաղի յուրաքանչյուր մասնակից ստանում է 3 “Տեխնիկական զննման կտրոն”:
Ø Խաղի յուրաքանչյուր մասնակից “Վարորդի քարտերի” վերևից պետք է վերցնի 2 հատ “Վարորդի քարտ”, (խաղը սկսում է ամենակրտսեր մասնակիցը):
Խաղը
Յուրաքանչյուր մասնակից, իր հերթի ժամանակ պետք է նետի զառը և իր խաղաքարը տեղաշարժի առաջ` ըստ զառի վրա նշված թվի: Կախված այն բանից, թե որ վանդակի վրա է դրվել մասնակցի խաղաքարը` նա պետք է պատասխանի հարցի կամ` կատարի վանդակի մեջ գրված հրահանգը:
Վանդակները
Ø “Սկիզբ” վանդակ` Խաղը սկսելուց հետո, յուրաքանչյուր մասնակից ամեն անգամ “Սկիզբ” վանդակով անցնելիս ստանում է մեկ “Վարորդի քարտ” մեկ “Տեխնիկական զննության կտրոնի” փոխարեն, բացառությամբ այն դեպքերի, երբ մասնակիցը հայտնվում է “Սկիզբ” վանդակում “Տուգանային հրապարակից” կամ “Հարց” վանդակից:
Ø “Կայանատեղի” վանդակ` Սա հանգստատեղի է: Եթե մասնակցի խաղաքարը ընկել է այս վանդակի վրա, ապա նա չպետք է կատարի որևէ գործողություն: Նա պետք է վայելի իր հանգիստը և սպասի իր հաջորդ հերթին:
Ø “Ավտովթար” վանդակ` երբ մասնակցի խաղաքարը հայտնվում է այս վանդակում, ապա նա կորցնում է 1 “Տեխնիկական զննության կտրոն” և տեղափոխվում է “Տեխ. սպասարկում” վանդակ:
Ø “Վերանորոգման կետ” վանդակ` այս վանդակում կատարվում է մասնակցի ավտոմեքենայի վերանորոգումը “Ավտովթարից” հետո:
Ø “Տեխ. զննում” վանդակ` անցնելով այս վանդակով մասնակիցը ստանում է 2 “Տեխնիկական զննության կտրոն”:
Ø “Հարց” վանդակ` Եթե մասնակցի խաղաքարը ընկել է այս վանդակի վրա, ապա նրա ձախակողմյան մասնակիցը վերցնում է մեկ հատ “Հարց քարտ” ընտրում է քարտի վրա գրված երեք համարներից մեկը և կարդում, “Հարց” վանդակում գտնվող մասնակիցը պետք է անվանի տվյալ նշանը և պատասխանի թե նշանների որ խմբին է այն պատկանում: Պատասխանը լսելուց հետո, համարը կարդացած մասնակիցը կարդում է ճիշտ պատասխանը (ճիշտ պատասխանը գրված է “Հարց քարտի” վրա): Այս գործողության ավարտից հետո այդ “Հարց քարտը” դրվում է մնացած “Հարց քարտերի” տակ: Ճիշտ պատասխանելու դեպքում խաղացողը շարժվում է մեկ վանդակ առաջ, սխալի դեպքում մասնակիցը մնում է “Հարց” վանդակում և սպասում հաջորդ քայլին:
Ø “Հարց” վանդակ Ճանապարհային Ոստիկանության (ՃՈ) նշանով` երբ մասնակցի խաղաքարը ընկել է այս վանդակի վրա, ապա նրա ձախակողմյան մասնակիցը վերցնում է մեկ հատ “Հարց քարտ”, ապա հերթականությամբ կարդում է քարտի վրա գրված երեք համարները: Յուրաքանչյուր համարի համար խաղացողը պետք է անվանի տվյալ համարի նշանը և պատասխանի թե նշանների որ խմբին է այն պատկանում: Պատասխանը լսելուց հետո, համարը կարդացած մասնակիցը կարդում է ճիշտ պատասխանը (ճիշտ պատասխանը գրված է “Հարց քարտի” վրա): Այս գործողության ավարտից հետո այդ “Հարց քարտը” դրվում է մնացած “Հարց քարտերի” տակ: Մեկ ճիշտ պատասխանի դեպքում խաղացողը շարժվում է մեկ վանդակ առաջ, երկու ճիշտ պատասխանի դեպքում խաղացողը շարժվում է երկու վանդակ առաջ, երեք ճիշտ պատասխանի դեպքում խաղացողը շարժվում է երեք վանդակ առաջ և ստանում է մեկ “Վարորդի քարտ”: Եթե խաղացողը ճիշտ չի պատասխանում ոչ մի հարցի նա զրկվում է մեկ “Վարորդի քարտից” և տեղափոխվում է “Սկիզբ” վանդակ:
Ø “Ավտոշուկա” վանդակ` Եթե մասնակցի խաղաքարը ընկել է այս վանդակի վրա, ապա նա կարող է իր “Վարորդի քարտերից” որևէ մեկը կամ մի քանիսը մեկ անգամ փոխանակել խաղի ցանկացած մասնակցի “Վարորդի քարտերից” մեկի կամ մի քանիսի հետ: Եթե նա չի ցանկանում փոխանակում կատարել, ապա կարող է չանել այն: Իսկ ցանկության դեպքում` նա պետք է որոշի, թե քանի “Վարորդի քարտ” է ցանկանում փոխանակել: Ընտրված մրցակիցը չի կարող հրաժարվել փոխանակումից, եթե ունի պահանջվող քանակի “Վարորդի քարտեր”: Փոխանակում անելու համար մասնակիցը պետք է`
· ընտրի այն մասնակցին, ում հետ ցանկանում է փոխանակել “Վարորդի քարտերը”,
· որոշի և հայտնի թե քանի քարտ է ցանկանում փոխանակել,
· կատարի փոխանակումը իր մրցակցի հետ:
Փոխանակման ժամանակ տվյալ մասնակիցը պետք է իր մրցակցին տա նույն քանակի “Վարորդի քարտ”: Չպետք է մոռանալ, որ կարևոր է այնպես խաղալ, որ մրցակիցները չկարողանան հավաքել 6 տարբեր “Վարորդի քարտ”: Խաղի մասնակիցներից ոչ մեկը չպետք է ցույց տա մյուսներին, թե փոխանակման ժամանակ ի՞նչ քարտ է տվել իր մրցակցին:
Ø “Մրցավազք” վանդակ` Եթե մասնակցի խաղաքարը ընկել է այս վանդակի վրա, ապա նա կարող է իր “Վարորդի քարտերը” մրցավազքի հանել (հնարավոր է, որ նա նույն քարտից ունենա մի քանի հատ) այլ մասնակցի “Վարորդի քարտերի” հետ` զառ նետելու միջոցով: Եթե մասնակիցը չի ցանկանում, նա կարող չմրցել: Իսկ եթե նա ցանկանում է մրցավազք վարել, ապա նա պետք է`
· ընտրի այն մրցակցին, որի հետ ցանկանում է մրցավազք վարել,
· որոշի, թե քանի քարտով է ուզում մրցավազք վարել: Նրա ընտրած մրցակիցը պետք է նույն քանակի քարտեր մտցնի մրցավազքի:
· Երկու մասնակիցներն էլ պետք է իրենց քարտերը դնեն խաղատախտակի վրա, որից հետ նրանք երկուսն էլ պետք է զառ նետեն:
Զառով ավելի մեծ թիվ նետած մասնակիցը հաղթում է և վերցնում է մրցավազքում ընդգրկված բոլոր “Վարորդի քարտերը”: Եթե երկուսն էլ նետում են նույն թիվը, ապա գործողությունը պետք է կրկնել այնքան անգամ, մինչև որ նրանցից մեկը նետի ավելի մեծ թիվ և հաղթի մրցավազքը:
Ø “Ավտոտնակ” վանդակ` Եթե մասնակցի խաղաքարը ընկել է այս վանդակի վրա, ապա նա կարող է իր “Վարորդի քարտերից” որևէ մեկը (երեսը ներքև շրջած) դնել իր առջև դրված “Ավտոտնակի” պատերի տակ, որտեղ այն կլինի ապահովության մեջ և ոչ ոք չի կարողանա այդ քարտը ներքաշել փոխանակության կամ մրցավազքի մեջ:
Ø “Նոր քայլ” վանդակ` Եթե մասնակցի խաղաքարը ընկել է այս վանդակի վրա, ապա նա ստանում է ևս մեկ անգամ զառ նետելու իրավունք:
Ø “5 քայլ հետ” վանդակ` Եթե մասնակցի խաղաքարը ընկել է այս վանդակի վրա, ապա նա պետք է իր խաղաքարը տեղաշարժի 5 քայլ հետ գտնվող վանդակի վրա և կատարի դրա վրա նշված հրահանգը:
Քարտերը
“Ապագա Վարորդ” դառնալու համար խաղի յուրաքանչյուր մասնակից պետք է աշխատի առաջինը հավաքել “Վարորդի քարտերի” ամբողջական հավաքածուն, որի համար նա պետք է ունենա 6 տարբեր “Վարորդի քարտերի” մեկական օրինակ:
· “Վարորդի քարտ”` Այս քարտերը 6-ն են և տարբեր` իրենց հետևյալ բովանդակությամբ` A Կարգ, B Կարգ, C Կարգ, D Կարգ, E Կարգ, Տեղեկանք առողջության վերաբերյալ:
Մասնակիցները խաղի ընթացքում կհավաքեն բազմաթիվ “Վարորդի քարտեր”, որոնք նրանք կարող են օգտագործել փոխանակելու համար կամ մրցելիս, բայց նրանք չպետք է մոռանան, որ հաղթելու համար պետք է հավաքել 6 տարբեր քարտերից կազմված “Վարորդի քարտերի” ամբողջական հավաքածուն:
· “Տեխնիկական զննման կտրոն”` · խաղի սկզբին մասնակիցները ստանում են երեքական այս կտրոններից, ևս երկու կտրոն մասնակիցը ստանում է ամեն անգամ “Տեխ. զննում” վանդակով անցնելիս: Տուգանային հրապարակում հայտնվելուց խուսափելու համար անհրաժեշտ է ունենալ առնվազն մեկ “Տեխնիկական զննման կտրոն”: Եթե մասնակիցը հայտնվում է ցանկացած “Հարց” վանդակում և չի ունենում ոչ մի “Տեխնիկական զննման կտրոն”, ապա նա տեղափոխվում է տուգանային հրապարակ, ինչից հետո բաց է թողնում մեկ քայլ և հայտնվում է “Սկիզբ” վանդակում:
· “Հարց քարտեր”` Այս քարտերը օգտագործվում են, երբ մասնակցի խաղաքարն ընկնում է “Հարց” վանդակի վրա: Յուրաքանչյուր “Հարց քարտում” նշված է երեք համար (ամեն համարին համապատասխանում է խաղատախտակի վրա նշված մեկ նշան) և այդ նշանների ճիշտ անվանումը և խումբը: Հարցը կարդում է “Հարց” վանդակում հայտնված խաղացողի ձախակողմյան մասնակիցը:
· “Ավտոտնակ”` Խաղի բոլոր մասնակիցները պետք է, մինչև խաղը սկսելը, նախապես վերցնեն և իրենց առջև դրված ունենան մեկ “Ավտոտնակ”, որպեսզի կարողանան ապահովության մեջ պահել իրենց հավաքած “Վարորդի քարտերը”: (առաջին անգամ խաղալուց պետք է հավաքել ավտոտնակները, ըստ գծագրի)
Հաղթող է ճանաչվում այն մասնակիցը, որն առաջինն է հավաքել 6 տարբեր քարտերից կազմված “Վարորդի քարտերի” ամբողջական հավաքածուն և ապահով կերպով տեղադրել է դրանք իր “Ավտոտնակի” պատերի ներքո և վերադարձել է “Սկիզբ” վանդակ:
Սիրելի մասնակիցներ, հուսով ենք, որ դուք մեծ բավականություն կստանաք այս խաղից` վերհիշելով և սովորելով ճանապարհային երթևեկության նշանները:
ՄԱՂԹՈՒՄ ԵՆՔ ՀԱՋՈՂՈՒԹՅՈՒՆ ԵՎ ՀԱՃԵԼԻ ԺԱՄԱՆՑ
ՀԳ: Խաղի հարցերը կազմվել են ՀՀ ճանապարհային երթևեկության կանոնների հիման վրա:
